COR N’OC 2014

Lo Festivau aupenc de chant occitan, lo 5en CÒR n’ÒC 2014 aviá ben intrincat lo sande 9 de novembre amb una matinaa per los Pechons au Centre Sociau de Beuregard, en preséncia de Mmas Brunel-Lardier e Mostachi conselheras municipalas e d’una assisténcia nomerosa. D'en prumier, los enfants de la Calandreta Gapiana an reprès las chançons apresas dempuei la debuta de l’annaa amb Jean-Paul Dumas qu'es pereu lo menaire dau Rescontre Gapian, Silvia Chedeville la regenta e Elisabeth Terenzi l’ajua mairala. Puei fuguec una prumiera amb lo cònte de la Ròsa blua e las mariòtas de Joseta. Aqueu cònte, revirat en occitan per l’atalier de lenga dau Rescontre, debana l’istòria d’una princessa que demanda que li siaja ofrit una ròsa blua per los pretendents que se la vòlon mariar… A la fin de la matinaa, los dròlles an poscut prendre las mariòtas en man, lor parlar e las manipular. La festa s'es achabaa per lo gòt de l'amistat e d'eschambis. Aquò aduse la proba que la lenga d'aquí es una bela lenga que pòt estre parlaa e chantaa per los mai joines.

Lo dimenche 9 de novembre après-dinnar, lo Centre Municipal Cultura e Lesers (C.M.C.L.) de Gap era clafit de monde, per acculhir los gropes conviats qu’anavan se completar armoniosament. Los italians de la Val Grana, Lo Corou de la Cevitou, avian enchantat lo monde, la velha, a la gleise de Veines (Veynes). Avans de tòrnar passar Larche blanchit per la prumiera neu, an dubert l’espectacle amb mestria, ramentant que l’Occitan a ges de frontieras. Aqueus de la Taiòla de Tallard, ben que pauc numeroses, an creat la suspresa e la curiositat en s’accompanhant d’una viela veritabla. Los Mantenaires Chansouris e los Bolegadís de Dinha, que tòrnan prendre una partença novela, fugueron fòrça aplaudits per un public amitós vengut retrobar los accents de la lenga dau País. Lo triò feminin Farf’elina de Dinha e los Sobeirans d’Embrun an sedusit per lor virtuositat e per la beutat de lors voses. Lo Rescontre Gapian, enfin, a fach pròva de sa vitalitat e de sa creativitat en chantant mai d’una de sas produccions dins la lenga nòstra. Los arrenjaments musicaus e armonisacions diversas dels gropes participants an fach espelir poesia e melodia qu’emànan d’aqueu parlar milenari e sempre vivent e an breçat aquel après-miegjorn subrebeu. A la sortia, mai d’un espectator parlava de la lenga de mon país... A l’an que ven e viva lo COR N’OC 2015 !